काठमाडौं, वैशाख ८ । आज देशभरको मौसम दिनभरीनै बदली रहने भएको छ । जल तथा मौसम पूर्वानुमान महाशाखाका अनुसार आज आईतवार आंशिक देखि सामान्य बदली भएर केही स्थानहरुमा मेघ गर्जन र चट्याङ हावाहुरीसहित हल्का वर्षाको सम्भावना रहेको छ ।

आइतबार राति पनि मौसम बदली हुने र थोरै स्थानहरुमा मेघ गर्जन र चट्यांग हावाहुरीसहित हल्का वर्षाको सम्भावना रहेको महाशाखाले जारी गरेको सूचनामा उल्लेख छ ।

मौसमविद गंगा नगरकोटीका अनुसार चट्याङ पर्दा यसबाट बच्न सबैभन्दा उत्तम उपाय घरभित्रै बस्ने, घरभित्र बस्दा पनि टेलिभिजन, टेलिफोन लगायतका विद्युतिय उपकरण नचलाउने, बन्द गर्ने, पानीका धाराहरु बन्द गर्ने, झ्याल तथा भित्तामा अडेस नलगाउने, अग्लो ठाउँमा नजाने

खुला चौरमा भएमा घोप्टो परेर बस्ने, रुखको नजिक तथा विद्युतका पोल नजिक नजाने, फलाम तथा तामा मेटलका करेन्ट प्रवाह हुने सक्ने सामाग्रीहरु नछुने, कार तथा गाडीभित्र भएमा झ्याल ढोका बन्द गरेर भित्रै बस्ने गर्नुपर्छ ।