धगगढी,असार २ । बझाङ सदरमुकाम चैनपुरको डुङग्री भन्ने स्थानबाट मष्टा गाउँपालिका जाँदै गरेको स। १ ज १०७२ नम्बरको जीप सोमवार डौठी भन्ने ठाउँमा दुर्घटना हुँदा ९ जनाको मृत्यु भएको छ। दुर्घटनामा चार जना घाइते भएको प्रहरीले जनाएको छ ।

सोमबार दिउसो २.४५ मा उक्त जीप दुर्घटनामा परेको हो । सुदूरपश्चिम प्रदेश प्रहरीका प्रमुख डीआईजी सुरज केसीका अनुसार दुर्घटनामा ज्यान गुमाउनेको सनाखत हुन समेको छैन । जीप दुई सय मिटर भीरमा खसेकाले घाइतेहरूको उद्धारमा कठिनाई भइरहेको प्रहरीले जनाएको छ।

भीरबाटै पनि चार जनाको उद्धार गरिसकेको प्रहरीले जनाएको छ । दुर्घटनाग्रस्त जीप भीरमा अड्किएको छ । बझाङका प्रमुख जिल्ला अधिकारी सुरेश सुनार, प्रहरी नायब उपरीक्षक सूर्यबहादुर केसी सहितको प्रहरीको टोली घटनास्थलतर्फ गएको छ।

प्रमुख जिल्ला अधिकारी सुनारले हेलिकप्टरबाट घाइतेहरूलाई अस्पतालसम्म पुर्याउने प्रयास भइरहेको जानकारी दिए । जीपको गियर फेल भएकाले दुर्घटना भएको प्रहरीले प्रारम्भिक अनुमान गरेको छ। गियर डाउन गर्दा फ्रि भएपछि स्पिडमा रहेको जीप दुर्घटना भएको हुन सक्ने डीआईजी केसीले बताए।