अमेरिका,साउन ९ । अमेरिकाले चार चिनियाँ नागरिकमाथि भिसा जालसाजी गरेको अभियोग लगाएको छ। चीनको सशस्त्र फौजसँगको सदस्यसताबारे ढाँटेर ती चिनियाँहरूले जालसाजी गरेको आरोप अमेरिकाले लगाएको हो।

चारमध्ये तीनजनालाई पक्राउ गरिएको छ भने चौथो व्यक्तिलाई सङ्घीय जाँच ब्यूरो (एफबीआइ)ले खोजिरहेको छ। उनी सान फ्रान्सिस्कोस्थित चीनको वाणिज्य दूतावासमा रहेको बताइएको छ।

एफबीआइका अधिकारीहरूले २५ वटा अमेरिकी शहरहरूमा चीनको सेनासँग “अघोषित आबद्धता” रहेका मानिसहरूसँग पनि अन्तर्वार्ता गरेको छ।

अभियोजनकर्ताहरूले अमेरिकामा सेनाका वैज्ञानिकहरूलाई पठाउने चीनको योजनाअन्तर्गतको यो एउटा हिस्सा भएको बताएका छन् ।
सेनासँग आबद्ध रहेको आरोप

अमेरिकाको न्याय मन्त्रालयका न्यायाधीवक्ता जोन सी डेमर्सले एउटा प्रेस विज्ञप्तिमा भनेका छन्- पिपल्स लिबरेसन आर्मीका सदस्यहरूले सेनासँगको “आबद्धता” लुकाएर अनुसन्धान भिसाका लागि निवेदन दिएका छन्।

“खुला समाजको फाइदा उठाएर प्राज्ञिक संस्थाको दोहन गर्ने चीनको कम्युनिस्ट पार्टीको यो एउटा अर्को पक्ष हो।”

अमेरिकाले सान फ्रान्सिस्कोस्थित चीनको वाणिज्य दूतावासमा एकजना चिनियाँ वैज्ञानिक रहेको घोषणा गरेपछि ती पक्राउहरू गरिएका हुन्।

एकदिन अगाडिमात्रै अमेरिकी अधिकारीहरूले चीन बौद्धिक सम्पत्तिको चोरीमा संलग्न रहेको आरोप लगाउँदै टेक्ससमा रहेको चीनको वाणिज्य दूतावास शुक्रवारसम्म बन्द गर्न निर्देशन दिएका थिए।

चिनियाँ नागरिकलाई पक्राउ गर्नुअघि बिहीवार चीनको विदेशमन्त्रालयका प्रवक्ता वाङ वेनबिनले अमेरिकाको आरोपलाई “दुर्भावनापूर्ण बदनाम” भनी व्याख्या गरेका थिए।

उनले चीनले आफ्नो वैधानिक अधिकारको सुनिश्चितताका लागि आवश्यक प्रतिक्रियाहरू जनाउनुपर्ने पनि बताएका थिए।

अमेरिकी राष्ट्रपति डोनल्ड ट्रम्प हालैका महिनाहरूमा चीनसँग कोरोनाभाइरसको विश्वव्यापी महामारी, व्यापार र हङकङको नयाँ सुरक्षा कानुनका विषयलाई लिएर पटकपटक खनिएका छन्।